Job 1

Isingeniso

1 Elizweni lase-Uzi kwakuhlala indoda eyayithiwa nguJobe. Indoda le yayingelasici, iqotho; yayimesaba uNkulunkulu ikuxwaya okubi.

2 Yayilamadodana ayisikhombisa lamadodakazi amathathu, 3 ilezimvu eziyizinkulungwane eziyisikhombisa, amakamela ayizinkulungwane ezintathu, izinkabi ezibotshwayo ezingamakhulu amahlanu labobabhemi abangamakhulu amahlanu, njalo ilezisebenzi ezinengi. Yayinothile okudlula bonke abantu beMpumalanga.

4 Amadodana akhe ayezophisana ukwenza amadili ezindlini zawo, anxuse odadewabo bobathathu ukuzakudla anathe labo.

5 Kwakusithi nxa usuphelile umkhosi wedili uJobe wayewabiza azowahlambulula. Ekuseni kakhulu wayesenza umhlatshelo wokutshiswa walowo lalowo esithi, “Mhlawumbe abantwabami benzile isono bathuka uNkulunkulu ezinhliziyweni zabo.” Lo waba ngumkhuba wakhe uJobe.

Ukulingwa Kokuqala kukaJobe

6 Ngelinye ilanga izingilosi zaziletha phambi kukaJehova, loSathane weza lazo. 7 UJehova wathi kuSathane, “Uvela ngaphi?” USathane wamphendula uJehova wathi, “Ngivela ekuzulazuleni emhlabeni, ngihambahamba ngisiya le lale.”

8 UJehova wasesithi kuSathane, “Usuke wayinanzelela yini inceku yami uJobe? Kakho emhlabeni onjengaye; kalasici, uqondile, indoda emesabayo uNkulunkulu, exwaya okubi.”

9 USathane waphendula wathi, “Kambe uJobe umesaba uNkulunkulu kungelalutho na?

10 Kawumbiyelanga ngothango yini yena lendlu yakhe, kanye lakho konke alakho? Uwubusisile umsebenzi wezandla zakhe kuze kuthi imihlambi yakhe yezimvu leyezinkomo igcwale ilizwe lonke. 11 Kodwa akuwelule isandla sakho uchithe konke alakho, uzabona uzakuthuka ekukhangele.”

12 UJehova wathi kuSathane, “Kulungile, konke alakho kusezandleni zakho, kodwa yena ngokwakhe ungamthinti.” Kwathi-ke uSathane wasesuka phambi kukaJehova.

13 Ngelinye ilanga amadodana kaJobe lamadodakazi akhe ayezitika ngokudla, enatha iwayini endlini yomnewabo omdala, 14 isigijimi safika kuJobe sathi, “Izinkabi bezilima labobabhemi besidla eduze khonapho, 15 kwafika amaSabhini ahlasela aqhuba konke ahamba. Izisebenzi azicakazile ngenkemba kwasala mina ngedwa engisindileyo ukuzakubikela!”

16 Sisakhuluma esinye isigijimi safika sathi, “Umlilo kaNkulunkulu wehla uvela phezulu wazitshisa izimvu lezisebenzi, kwasala mina ngedwa ukuzakubikela!”

17 Elokhu esakhuluma kwafika esinye isigijimi sathi, “AmaKhaledi abe yimikhakha emithathu ehlela emakamelweni akho awaqhuba ahamba lawo. Izisebenzi azilalise phansi ngenkemba kwasila mina ngedwa ukuzakubikela!”

18 Elokhu esakhuluma kwafika njalo esinye isigijimi sathi, “Amadodana lamadodakazi akho abesidla edilini enatha iwayini endlini yomnewabo omdala, 19 kwathi masinyane vungu isivunguzane siqhamuka enkangala saphekula amagumbi womane endlu. Ithe mbo phezu kwabo bahle bafa, kwasila mina ngedwa ukuzakubikela!”

20 Ekuzwa lokho uJobe wasukuma wadabula isambatho sakhe, waphuca ikhanda lakhe. Wazilahla phansi wakhonza 21 wathi: “Ngaphuma ngize esiswini sikamama, njalo ngizasuka ngize. UJehova wapha njalo uJehova usethathile; kalidunyiswe ibizo likaJehova.”

22 Phakathi kwakho konke lokhu uJobe kazange enze isono ngokubeka umlandu uNkulunkulu athi wonile.